pinalid nga panid

Dili lalim nga duha ka tuig

2011-06-01T05:25:00.002+08:00

Pasayloa ko

Kung daw gikalimtan na tika

Apan huna-hunaa ayaw

Kay bisan man sa akong kalinga

Nagpahipi ra ikaw

Sa akong panumduman

Ug sa akong kasing-kasing.

Dalan sa Kasaysayan

2009-03-23T10:58:00.001+08:00

Subay sa Dalan, Subay sa Kasaysayan…
sa imong pagsubay sa dalang Colon
Mao kini ang labing tukma nga mga pulong
Nga imong maingon
Kana kung ikaw naa’y oras sa pagmatikod
Bisan man lang dili sa pagpakabana

Ay, Bata!

2009-03-17T21:52:00.000+08:00

Ang akong igsuon nilarga sa Norte kuyog iyang tibuok pamilya. Kay tingsakay man atong adlawa, akong maguwang ra’y nakalingkod ug iya lang gisabak iyang anak nga babaye samtang iyang bana ug iyang anak nga lalake namarog lang. Pipila ka gutlo ang nilabay nireklamo na intawn ang kuwatro anyos nga bata.

Francis: Mama, molingkod na ko Mama uy kay kapoy na man.

Mama: Tindog lang Dodong uy kay strong bitaw ka. Big boy na baya ka.

Francis: Unya bi kay nahurot na man akong strong!

Luyo sa Kabuang

2009-03-13T23:42:00.001+08:00

Ngano man nga daw pirmi ra man akong yam-iran sa kapalaran?
Pirmi ming libugon, pirming hasulon, ug pirming gubuton ang akong pagpuyo
Dili man unta ko pulitiko aron silutan og ingon ani

Ang ako ra gyung gipangayo nga moginhawa
Nga dili pagpanghupaw
Ug mopahiyom nga dli aron tabunan
Ang kaguol, kasakit o kasilag
Diha sa kapalarang
Pirmi lang gayam-id

That tatsulok nga pahinumdom

2009-03-12T21:56:00.004+08:00

Ngano kaha ning pahinumdom sa Lactum nga "kapanatag" - ang taga-Cebu nga inahan nag-Tinagalog man pero ang taga-Davao hinuon nag-Binisaya. Kani ra bang mga taga-Sugbo kay may pagka-allergic sa pinulungang taga-Manila.

One Visayas, Cinema Rehiyon, ug uban pa.

2009-03-11T07:29:00.003+08:00

Pagka-Dominggo nakahigayon ko sa pag-attend og mga nagkalain-laing kalihukan nga nagpasundayag og mga salida nga hinimo sa mga Cebuano o mga Bisaya. Misulat ko bahin niini apan kay iningles man ni akong sinulat, i-redirect lang mo ini sa usa nako ka site. :)

It was a day of many firsts for me yesterday, March 8, 2009. I am glad for the opportunities that are coming my way and I realize that it is now happening – the reality of the (re)journey of this native stranger to her home. And I could only thank Diem Judilla, Jurly Maloloy-on, Doreen Sy Maloloy-on, and SineBuano as a whole for that. more about it here>>.

Tambay goes French cuisine

2009-02-28T07:44:00.001+08:00

Whew! Gastronomic. Good mood si Boss maong namangka siya sa iyang paborito nga restaurant. Kay lagi, siya usa ka French, sakto ra pud nga ang paborito niyang kan-anan French cuisine pud ang ihikay para niya (at this point I reflect on Filipinos’ nationalism expressed through the food that they choose to eat. Apparently, there is…which is probably why many Filipinos like Cebuanos have to “smuggle” in their luggage some intricately wrapped buwad, ginamos, hipon, etc. when they go to a foreign land so many miles away from the haven of Taboan and Carbon. And abroad, their neighbors call the police for these weirdoes’ ” illegal” cooking of smelly salted dried fish..Filipinos know this risk but duh, craving for food is like libido or drug addiction, or addiction to anything at that, you can just risk anything.)

Sa pagkadungog nako sa moang imbitasyon, nakahuna-huna dayon ko nga mangandam. Ayay, unsaon na lang nga matod pa niya, ang among adtoan usa sa mga inilang kan-anan sa Sugbo (from the point of view of the rich [and parvenus I supposed], he actually pointed that out. But don’t get me wrong, he did not say it in any way offensive or sarcastic. He seems to be very interested of showing us a world distant from ours or from mine since I am the one making a fuss out of it. ) Apan tungod sa katapol, wa na lang ko nagsuway pa’g pangita’g maayong costume nga moangay og fine dining. Sama sa mga ordinaryong adlaw sa trabaho, nag-jeans ug shirt ra ko ug nagsandal atong sinuroy ni Manong nga gipalit pud sa akong Mama. Maayo nang klaro na daan nga di ta hanas og table etiquette. Sa mga dili taga-atoa, aw, tinidor ug kutsilyo man ning ilang gamiton…ug uban pang tinidor, kutsilyo, ug kutsara/kutsarita. Apan kitang mga Pinoy, kutsara og tinidor ra ma’y gamiton katong na-civilized na ta. Pero pwede ra man gani kinamuton nang linung-ag nga NFA sinud-anan og piniritong isda nga isawsaw sa patis (toyo) ug suka.

Ug tuod man pag-abot sa alas dose sa udto si Boss nagkanayon. Shall we? Gidala mi niya sa The Gustavian. Niorder mi’g Carpaccio de Boeuf para hors d’oeuvre (appetizer ba). Tender, cold, and refreshing. Maka-iningles ta’g ahat. Pero imagina, baka tuod, pero hilaw to siya…counterpart sa kinilaw. Maayo man hinuon pagkalata ang baka. Usa ka adlaw tingali tong wa’y haon-haon sa ibabaw sa sugnod. Gisagulan man to’g sardinas ug linung-ag nga itlog ibabaw sa mga dahon nga mura’g Chinese pechay tan-awon.

Para sa main course, sole fillet with spinach rice. Kami lang ang nag-rice sa akong usa ka kauban. Sila, spinach ra. Ang usa pud, Duck Pie on hot plate ang gi-order. Tan-aw nako lami gyud siguro iyang gikaon kay mura’g nalipay man siya sa matag hungit ug matag pangutana sa iya kung lami ba. Maayo pud namong kaon. Humok pud ang sole fillet, isda na siya. Dugay namo nasugdan og habhab kay init pa man kaayo. Para sa drinks, ah, ako gyung paborito – mango shake ra gud. Di na gyud to siya French kay naa ma’y daghang mangga sa Mandaue. Dessert? Ang usa niorder og cake, ako chomamile tea lang, dili gren (green gud na siya, pero nabantayan pa gyud sa akong tupad ang gren nga ingon sa waitress) tea (kanang chomamile ba, mao ba nang mansanilla? Ihaplas sa bata kung mabutdan unya molawm ang hubon?).

Pila ma’y sugilanon, namalik ra pud mi sa trabaho human ang taas-taas nga lunchbreak. Pagkagabii nangutana akong officemate, “giganahan mo sa pagkaon ganiha?” Sa tinuod lang, kung ako ang pangutan-on, ok lang. Wa ingon nga giganahan kaayo pero wa sad ko lud-a. Siya diay kay wa ganahi sa iyang duck pie. “Ha? Abi ko ba’g lami kaayo tong kaon nimo,” Ingon ko.

Damgo

2008-12-01T21:51:00.000+08:00

Kung balaknon lamang ako
Siguro karon
Nasulat ko na ang kabugnaw sa hangin sa kadlawon
Nga mohunghong sa akong dunggan
Aron ako pukawon

Nasulat ko na unta ang hulagway sa sayong kabuntagon
Ang pahiyom ni Haring Adlaw
Nga mosugat kanako
Aron bukhon ko ang akong mga mata

Nasulat ko na unta ang kagumkom nga buwad bulinaw
Nga daw tambol sulod sa akong baba
Matag hungit
Matag usap
Aron busgon ako usa ang paniudto

Nasulat ko na unta ang yarok sa Aqua Sana
Nga midagayday sa akong tutunlan
Sa esopago
Ug kung hain man siya paingon
Inig human

Nasulat ko na unta ang lakang sa akong mga tiil
Nga nag-inunhanay
Sa dalan
Aron ako dad-on sa kung unsa man ang akong abutan

Nasulat ko na unta ang paghaguros sa sakyanan
Nga mipalid
Sa akong huna-huna
Padulong sa kawanangan

Nasulat ko na unta ang hinagtik sa mga kamot
Sa orasan
Nga nagbantay
Sa akong matag lihok
O di ba kaha, ako ang gabantay-bantay kaniya

Nasulat ko na unta
Ang pagpuli sa kilom-kilom
Ug ang pagbutho sa buwan
Timaan sa kahumanan

Nasulat ko na unta ang
Akong kinabuhi sa kagabhion
Bisan sa pagpiyong sa mga mata
Ang pagdamgo
Nga balaknon lang unta ako.