Kung balaknon lamang ako
Siguro karon
Nasulat ko na ang kabugnaw sa hangin sa kadlawon
Nga mohunghong sa akong dunggan
Aron ako pukawon
Nasulat ko na unta ang hulagway sa sayong kabuntagon
Ang pahiyom ni Haring Adlaw
Nga mosugat kanako
Aron bukhon ko ang akong mga mata
Nasulat ko na unta ang kagumkom nga buwad bulinaw
Nga daw tambol sulod sa akong baba
Matag hungit
Matag usap
Aron busgon ako usa ang paniudto
Nasulat ko na unta ang yarok sa Aqua Sana
Nga midagayday sa akong tutunlan
Sa esopago
Ug kung hain man siya paingon
Inig human
Nasulat ko na unta ang lakang sa akong mga tiil
Nga nag-inunhanay
Sa dalan
Aron ako dad-on sa kung unsa man ang akong abutan
Nasulat ko na unta ang paghaguros sa sakyanan
Nga mipalid
Sa akong huna-huna
Padulong sa kawanangan
Nasulat ko na unta ang hinagtik sa mga kamot
Sa orasan
Nga nagbantay
Sa akong matag lihok
O di ba kaha, ako ang gabantay-bantay kaniya
Nasulat ko na unta
Ang pagpuli sa kilom-kilom
Ug ang pagbutho sa buwan
Timaan sa kahumanan
Akong kinabuhi sa kagabhion
Bisan sa pagpiyong sa mga mata
Ang pagdamgo
Nga balaknon lang unta ako.
